Ыйманым — ыйык мурасым
24-октябрда Талас мамлекетик университетинде » Ыйманым — ыйык мурасым» аттуу облустук ыйман фестивалы Талас шаарындагы кесиптик орто окуу жайлары арасында болуп өттү. Ага Талас агрардык колледжинин “Бийиктик” командасы, Талас медициналык колледжинин “Минздрав” командасы жана Талас мамлекеттик университетинин алдындагы кесиптик орто билим берүү бөлүмүнүн “Кут” командасы ат салышты. Жобонун шарты боюнча алгач аталган командалар саламдашуусун тартуулап, андан соң коомдогу ыймандуулукту жана ыймансыздыкты даңазалаган сценкалык көрүнүштөрдү аткарышып, “диний экстремизм, терроризм жана таза ислам дини, бүткүл дүйнөлүк желе-тор, интернет бизди азгырабы же канат болуп береби” деген темаларга карата ой толгоолорун түрдүү чыгармачылык фокуста көрсөтө алышты. Акырында «Кыргыз жери кызыктырып кыйланы, кыз уулунун арта берсин ыйманы» аттуу темада музыкалаштырылган номерлерди жогорку чеберчиликте аткарышып, көрүүчүлөргө Кыргызстанга болгон урматтоо, сыймыктануу сезимдерин тартуулай алышты. Таймаштын жыйынтыгында 118 упай менен Талас мамлекеттик университетинин алдындагы кесиптик орто билим берүү бөлүмүнүн “Кут” командасы 1-орунду татыктуу жеңип алды. Ал эми 2-орунду 112 упай менен Талас агрардык колледжинин “Бийиктик” командасы женип алса, 3-орунду 103 упай менен Талас медициналык колледжинин “Минздрав” командасы алды. Фестивалдын соңунда калыстар курамы командаларга өздөрүнүн ой-пикирлерин жана каалоо-тилектерин айтышып, командалар менен жакшы аткарган студенттерге Талас шаардык мэриясы тарабынан баалуу белектер ыйгарылды.
