Сыйлык ээсин куттуктайбыз!
18-ноябрда Талас мамлекеттик университетинин кесиптик орто билим берүү бөлүмүндө аталган окуу жайдын директору Шамуратов Калыбек Тазырбековичке Кыргыз Республикасынын “Ардактуу инсандары” коомдук бирикмеси тарабынан “Эл сүйгөн жетекчи” номинациясындагы төш белги жана күбөлүктү тапшыруу аземи болуп өттү. Иш чарага Талас шаарынын мэри А.Ж.Жусупбеков, эл депутаттарынын шаардык кеңешинин төрагасы М.И.Эсенкулов, коомдук бирикменин Талас облусу боюнча координатору С.М.Кыдыралиев, коомдук бирикменин мүчөлөрү К.Б.Сарчаев, Н.Дүйшөнбиев жана университеттин ректору А.Ш.Упенов катышты.
Шамуратов Калыбек Тазырбекович
1979 –жылы Фрунзедеги политехникалык институттун механика-машина куруу факультетинин “Автомобилдер жана автомобил чарбасы” адистигин бүтүрүп, “инженер-механик” квалификациясына ээ болгон.
1979-жылдан 2003-жылга чейин авточарба тармагындагы өндүрүштө үзүрлүү эмгектенген. Катардагы инженерден баштап башкы инженер, директордун орун басары кызматтарын аркалаган.
2003-жылы Талас мамлекеттик университетинин технологиялык институтуна окутуучу болуп кирип, 2004-жылдан 2009-жылга чейин ага окутуучу, кафедра башчысы, директордун орун басары кызматтарында иштеди. 2009-жылы университеттин алдында кесиптик орто билим берүү бөлүмү (колледж) ачылгандан бери ушул окуу жайда директорлук кызматты аркалап келе жатат.
Анын жетекчилиги астында окуу жайдын материалдык-техникалык базасы жылдан жылга кеңейип өсүп келе жатат. Педагогикалык кадрлардын квалификацияларын жогорулатууда бир топ үзүрлүү иштер колго алынды. Муну менен бирге окутуучулардын окуу-усулдук иштерин арттырууга да директордун жеке салымы зор. К.Т.Шамуратов кырктан ашык илимий жана окуу-усулдук эмгектердин автору. 2015-жылы республикабыздын жогорку окуу жайларынын «Жол кыймылынын коопсуздугу» адистигинин студенттери үчүн окуу куралы, КР Билим берүү жана илим министрлигинин атайын грифи ыйгарылуу менен жарыкка чыкты. Бул эмгек республикабыздын ар бир регионундагы техникалык адистиги бар жогорку окуу жайларында кызыгуу жаратып, ал окуу жайлардын илимий китепканаларына окуу куралы катары кабыл алынды. Ушул эмгеги үчүн К.Т.Шамуратов Кыргыз Республикасынын Президентине караштуу Мамлекеттик улуттук тил комиссиясынын ардак грамотасына татыктуу болду.
