ТалМУда 10-ноябрь Илим күнү салтанаттуу белгиленди. ТалМУнун профессордук-окутуучулар курамы тарабынан акыркы беш жылдыкта изилденип, жыйынтыктары басмадан чыгарылган илимий-усулдук эмгектердин көргөзмөсү уюштурулду. Университеттин окумуштууларын куттуктоо үчүн Кыргыз Республикасынын Президентинин Талас облусундагы ыйгарым укуктуу өкүлүнүн орун басары К.Б.Жанузакова, Талас шаарынын вице-мэри М.Э.Сейдикеримова, ТалМУнун ректору А.Ш.Упенов, окуу жана илимий иштер боюнча проректор С.С.Жумалиев сөз сүйлөшүп, адамзат коомундагы илимдин ордуна, маанисине токтолушуп, окуу жайда эмгектенип жаткан окумуштуулардын эмгектерин баса белгилешти. Илим жаатында ийгиликтерге жетишкен окумуштууларга Талас шаардык мэриясынын, Талас шаардык депутаттар кеңешинин жана университеттин ардак грамоталары, ыраазычылык каттары тапшырылды. Андан кийин илимдин докторлору Ш.Ж.Курманкулов, А.Ж.Ажибаевага сөз кезеги берилип, изденүүчүлөргө илим изилдөө боюнча акыл-кеңештерин айтышып куттукташты. «ТалМУнун илимий ишмердүүлүгү» аттуу видео-тасма көрсөтүлгөндөн кийин, илимий баяндамалар окулду: биология илимдеринин кандидаты, доцент З.Т.Койчуманов «Талас облусунун топурак маалымат системасын түзүүдөгү көйгөйлөр»; изденүүчү Р.А.Үркүмбаева «Научно-педагогическая деятельность Л.А.Шеймана и его роль в становлении методики преподавания русской литературы в кыргызской школе»; изилдөөчү Ж.Э.Өмүрканова «Калктын жашоо деңгээлинин көрсөткүчтөрү жана аларды аймактык деңгээлде аныктоо маселеси» аттуу темаларда окушту. ТалМУнун ректору А.Ш.Упенов өзүнүн жыйынтыктоо сөзүндө окуу жайдагы илимий ишмердүүлүктү күчөтүү, өнүктүрүү, интеграциялаштыруу багытында иштер үзгүлтүксүз улантыла берерин баса белгиледи. Иш-чаранын соңу көңүл көтөргөн ыр-бийлер менен жыйынтыкталды. Иш-чараны университеттин көркөм жетекчиси Э.О.Эсенаманов алып барды.
