«Таланты элге арналган өмүр» аттуу конференция болуп өттү

16-майда ТалМУда Кыргыз Республикасынын Эл акыны, Токтогул атындагы сыйлыктын ээси Байдылда Сарногоевдин 90 жылдык мааракесине арналган «Таланты элге арналган өмүр» аттуу конференция болуп өттү. Аны ректор А.Ш.Упенов ачып, куттуктоо сөздү Кыргыз Республикасынын маданият, маалымат, спорт жана жаштар саясаты министри А.К.Жаманкулов сүйлөп, Байдылда Сарногоевдин кыргыз маданиятындагы ордун, маанисин баса белгиледи. Андан кийин КРнын Эл акыны Анатай Өмүрканов, мааракенин башкы уюштуруучусу Индира Куралбекова, ТалМУнун окуу-илимий иштери боюнча проректору С.С.Жумалиев акындын өмүрү, чыгармачылыгы боюнча омоктуу ойлорун айтышты. Конференция жыйынтыкталгандан кийин, окутуучулар менен студенттер Байдылда Сарногоевдин ырларынан көркөм окушуп, обондуу ырларынан аткарышты. Байдылда Сарногоевдин ырлары, чыгармалары чыккан китептердин, газета-журналдардын жана анын өмүрү-чыгармачылыгына арналган көргөзмө Талас облустук усулдук билим берүү борбору менен биргеликте уюштурулду.