«Айтматовдук окуу — 2023» аттуу XX студенттик илимий-практикалык конференция

Талас мамлекеттик университетинде залкар жазуучу Чыңгыз Айтматовдун 95 жылдык мааракесине арналган «Айтматовдук окуу — 2023» аттуу XX студенттик илимий-практикалык конференция болуп өттү. Конференцияга 160тан ашуун макала келип түшкөн жана 9 секцияда илимий талкуулар жүрдү. Конференциянын пленардык бөлүгүндө «Ч.Айтматов жана Манас» (А.Өзүбекова), «Ч.Айтматовдун чыгармаларындагы элдик педагогикалык идеялар» (Л.Жамалбекова), «Нейронные сети и их применение» (А.Егешов), «Жаңы табылгалар: Манас районунун Сөгөт айылындагы тарыхый эстеликтерди изилдөө» (К.Дүйшөнбеков) деген актуалдуу темаларда презентациялык баяндамалар окулду. Андан кийин англис тили адистигинин студенттери тарабынан даярдалган Ч.Айтматовдун «Биринчи мугалим» чыгармасынан сахналык көрүнүш коюлду. Секциялык отурумдардын жыйынтыгы менен резолюция кабыл алынып, эң мыкты илимий жана стартап темаларды изилдеп алып чыгышкан студенттерге грамоталар, ал эми калган студенттерге сертификаттар ыйгарылды.