Эл жазуучусу Элүүбай Отунчиев элетте жашап, айыл турмушун, кыргыз элинин тарыхын көркөм иликтеп келаткан сүрөткерлерден.
Анын чыгармалары роман, повесть, аңгемелери кызыгуу менен окулуп, эгемендик тушунда жазуучу тарыхый темага кайрылып мыкты чыгармаларды жаратты. Аспирант-изилдөөчүлөр тарабынан жазуучулардын чыгармачылыгын изилдөө актуалдуу темалардан. КРУИАнын аспиранты, ТалМУнун окутуучусу Ж. Бейшекеева Э.Отунчиевдин чыгармачылыгы боюнча илимий теманын үстүндө изилдеп келүүдө. Ушул күндү утурлай жазуучунун 85 жылдыгына карата Талас мамлекеттик университетинде “Элүүбай Отунчиев-кыргыз элинин таланттуу калемгери” аталышта адабий-музыкалуу кече болуп өттү. Кечеге Кыргызстан Жазуучулар союзунун мүчөлөрү, Талас облусунун Жазуучулар союзунун төрайымы А.Момунтаева, Ж.Баласагын атындагы КУУнун доценти,ф.и.к,Б.А.Баймырзаев, И.Раззаков атындагы КМТУнун окутуучусу И.Т. Калмырзаев, Талас облусунун өкүлүнүн орун басары М.Э. Сейдикеримова, Талас шаарынын мэриясынын социалдык иштер боюнча адиси Н.Камчыбекова, облусубуздун кыргыз тилчи мугалимдери жана ТалМУнун жалпы профессордук-окутуучулары катышышты.
Алгач жазуучу тууралуу Талас УТРКсы тарабынан видео слайд көрсөтүлүп, К.Медетбеков атындагы Талас облустук драма театры тарабынан даярдалган “Молдо Асан” чыгармасынан сахналаштырылган көрүнүш тартууланды.
Андан соң ТалМУнун ректору тех.и.д, профессор Ж.С.Шаршембиев кечени салтанаттуу түрдө ачып, жазуучунун чыгармачылыгына токтолуп, ден соолук, бактылуу, дөөлөттүү карылык жана дагы калем сабыңыздан мыкты чыгармалар жарала беришине тилектештигин билдирип,
белек тапшырды. Келген коноктор кара сөз чебери Э.Отунчиев жөнүндө, анын чыгармачылыгы тууралуу ой-пикирлерин билдиришти.
Студенттер тарабынан чыгармалары көркөм окулду, мыкты көркөм окуган активдүү студенттерге айылдаш иниси И.Раззаков атындагы КМТУнун профессору техника илимдеринин доктору А. С. Уметалиев өзүнүн белектерин тапшырып, ал эми ТалМУга 200 китеп белекке берди. Жазуучунун үй-бүлөсү тарабынан окуу жайга китептер белекке берилип, уюштуруучуларга ыраазычылык билдиришти.
Кече маданий программа менен коштолуп жыйынтыкталды.
