2024-жыл Шанхай кызматташтык уюмунун мейкиндигинде “Экология жылы” деп жарыяланган. Ушул жылдын алкагында жана Илим күнүнө арналып, бүгүн 29-ноябрда К. Медетбеков атындагы Талас облустук музыкалык драма театрында Талас мамлекеттик университетинин Табият таануу, педагогика факультетинин Табият таануу кафедрасынын демилгеси менен илимпоз, биология илимдеринин кандидаты,доцент Сагынбеков Жышан Сагынбековичтин 85 жаш мааракесине арналган эл аралык илимий-практикалык конференция өткөрүлдү.
И.Арабаев атындагы Кыргыз мамлекеттик университети уюштурган Кара кыргыз автономиялуу облусунун түзүлгөндүгүнө 100 жыл архивдик фото материалдардын көргөзмөсү коюлуп, экологиялык глобалдык жана жергиликтүү көйгөйлөрдү чагылдырган видеоролик көрсөтүлдү.
Илимий практикалык конференциянын пленардык отурумун Эл аралык экология академиясынын академиги, Низами атындагы Ташкент мамлекеттик педагогикалык университетинин, География жана аны окутуунун усулдары кафедрасынын профессору Аскар Нигматов, ОшМУнун доценти, профессор Абдурашит Низамиев, И. Арабаев атындагы КМУнун физика-математика факультетинин деканы Күлзат Токонбековалар илимий баяндамаларды жасашты.
Конференциянын максаты экологиялык көйгөйлөргө коомчулуктун көңүлүн буруу, табигый ресурстарды сарамжалдуу пайдаланууну жайылтуу, айлана-чөйрөнү коргоо маданиятын жогорулатуу жана туруктуу өнүгүүгө шарт түзүү.
Иш-чарага КРнын Президентинин Талас облусундагы өкүлүнүн орун басары
М.Э. Сейдикеримова катышып, конференциянын ишине ийгилик каалоо менен б.и.к,доценттер Ж.С.Сагынбековго Талас облусунун өсүп- өнүгүүсүнө кошкон жигердүү салымы үчүн “Талас 80 жыл” юбилейлик медалын, З.М.Ташыбековага “Талас облусуна сиңирген эмгеги үчүн” төш белгисин тапшырды.
Талас шаарынын мэриясынын аппарат жетекчиси Э.Окенов жалпы катышуучу конокторду куттуктап, маараке ээсине Талас шаардык мэриясынын Ардак грамотасын тапшырды.
Талас мамлекеттик университетинин Окумуштуулар кеңешинин чечими менен окуу жайга сиңирген эмгеги үчүн , көптөгөн илимий эмгектердин ээси, илимпоз Ж.С.Сагынбековго “ТалМУнун Ардактуу профессору” наамы ыйгарылды.
Секциялык иштерде илимпоздор, окутуучулар жана магистранттардын илимий баяндамалары окулуп,кызуу талкууланып, катышкандыгы тууралуу сертификаттар тапшырылды.
Андан соң келген конок катышуучулардын маанайын көтөргөн маданий программа тартууланды.
Жыйынтыгында , айтылган айрым сунуштарды киргизүү менен резолюция кабыл алынды.
