Доорубуздун улуу сүрөткери, заманыбыздын залкары, жаңыча көз караштагы, багыттагы адабий чыгармалары менен улуттук адабиятка кайталангыс бурулуш жасаган, кыргыз атын өз чыгармалары менен бүт дүйнөгө тааныткан улуу инсан, Кыргыз Эл баатыры, Кыргыз Эл жазуучусу Чыңгыз Айтматовдун туулган күнү жана оозеки чыгармачылык менен профессионал адабияттын ортосунда арасат калган кыргыз поэзиясын жаңыча багытка алып чыккан, чыныгы профессионалдык деңгээлге чыгуусуна өз салымын кошуп кеткен, аз жашаса да, кыргыз адабиятына ат көтөргүс эмгек жасаган акын Алыкул Осмоновдун көз жумган күнү катары белгилүү. Мына ушул эки символикалуу датаны эске алуу менен 2011-жылдын 28-январында Кыргыз Республикасынын Жогорку Кеңешинин атайын токтому аркылуу Кыргыз Эл акыны, ошол кездеги Жогорку Кеңештин депутаты Эгемберди Эрматовдун демилгеси менен 12-декабрь Улуттук адабият күнү деп кабыл алынган.
Даталуу күндү утурлай Талас Мамлекеттик университетинин профессордук-окутуучулар жамааты да Ч. Айтматовдун айкелине гүл-чамбарларды коюшуп, шаардык маданият үйү уюштурган маданий программага активдүү катышышты. Куттуктоолор айтылып, чыгармаларынан көркөм окулду.
Андан соң Иш-чара уланып жазуучунун чыгармалары кинотеатрда көркөм тасмалары көрсөтүлүп, драмтеатрда “Делбирим” чыгармасы коюлуп студенттерге тартууланды.
