Түрк тилин үйрөтүү борборунун ачылышы

Бүгүн Талас мамлекеттик университетинде түрк тилин үйрөтүү борбору ачылды. Борбор Түркия Республикасынын Кыргызстандагы элчилигинин жана Түрк кызматташтык жана координация агенттигинин (ТИКА) колдоосу менен толук ремонттолуп, заманбап жасалгаланды. Ачылыш аземинде Кыргыз Республикасынын Президентинин Талас облусундагы ыйгарым укуктуу өкүлүнүн орун басары М.Э.Сейдикеримова, Түркия Республикасынын Кыргызстандагы элчиси Ахмет Садык Доган, Кыргыз Республикасынын Жогорку Кеңешинин депутаты Д.А.Жумабеков куттуктоо сөздөрүн сүйлөшүп, борбордун ишине ийгилик каалашты. Маданий программа тартууланып, кызыл лентасы кесилип, борбордун ичинде коноктор тарабынан жакшы каалоо-тилектер айтылды. Борбордун ачылышына салым кошкондорго ТалМУнун ректорунун милдетин аткаруучу С.С.Жумалиев ыраазычылык каттарын тапшырып, жалпы эмгек жамаатынын жана студенттердин атынан ыраазычылыгын билдирди. Канча тил билсең, ошончо эл билесиң дегендей, түрк тилин окуп үйрөнүү аркылуу ал элдин маданиятын, тарыхын билип, Түркиядан билим алууну каалагандар үчүн ыңгайлуу мүмкүнчүлүктөр түзүлөт. Ошондой эле заманбап билим берүүнү өнүктүрүүгө, жаңы билимдерди, тажрыйбаларды үйрөнүүгө өбөлгө түзөт, окуу жайдын материалдык-техникалык базасы жакшырат.